वैशंपायन उवाच । (१।१)

अथाब्रवीन्मयः पार्थम् अर्जुनं जयतां वरम् । (१।२)

आपृच्छे त्वां गमिष्यामि क्षिप्रम् एष्यामि चाप्यहम् ॥ (१।३)

उत्तरेण तु कैलासं मैनाकं पर्वतं प्रति । (२।१)

यक्ष्यमाणेषु सर्वेषु दानवेषु तदा मया । (२।२)

कृतं मणिमयं भाण्डं रम्यं बिन्दुसरः प्रति ॥ (२।३)

सभायां सत्यसंधस्य यद् आसीद् वृषपर्वणः । (३।१)

आगमिष्यामि तद् गृह्य यदि तिष्ठति भारत । (३।२)

विश्रुतां त्रिषु लोकेषु पार्थ दिव्यां सभां तव । (३।३)

प्राणिनां विस्मयकरीं तव प्रीतिविवर्धिनीम् । (३।४)

पाण्डवानां च सर्वेषां करिष्यामि धनंजय ॥ (३।५)

ततः सभां करिष्यामि पाण्डवाय यशस्विने । (४।१)

मनःप्रह्लादिनीं चित्रां सर्वरत्नविभूषिताम् ॥ (४।२)

अस्ति बिन्दुसरस्येव गदा श्रेष्ठा कुरूद्वह । (५।१)

निहिता यौवनाश्वेन राज्ञा हत्वा रणे रिपून् । (५।२)

सुवर्णबिन्दुभिश्चित्रा गुर्वी भारसहा दृढा । (५।३)

स्वर्णभारसहस्रेण निर्मिता शत्रुघातिनी ॥ (५।४)

सा वै शतसहस्रस्य संमिता सर्वघातिनी । (६।१)

अनुरूपा च भीमस्य गाण्डीवं भवतो यथा ॥ (६।२)

वारुणश्च महाशङ्खो देवदत्तः सुघोषवान् । (७।१)

सर्वम् एतत् प्रदास्यामि भवते नात्र संशयः । (७।२)

इत्युक्त्वा सो ऽसुरः पार्थं प्रागुदीचीम् अगाद् दिशम् ॥ (७।३)

उत्तरेण तु कैलासं मैनाकं पर्वतं प्रति । (८।१)

हिरण्यशृङ्गो भगवान्महामणिमयो गिरिः ॥ (८।२)

रम्यं बिन्दुसरो नाम यत्र राजा भगीरथः । (९।१)

दृष्ट्वा भागीरथीं गङ्गाम् उवास बहुलाः समाः ॥ (९।२)

यत्रेष्ट्वा सर्वभूतानाम् ईश्वरेण महात्मना । (१०।१)

आहृताः क्रतवो मुख्याः शतं भरतसत्तम ॥ (१०।२)

यत्र यूपा मणिमयाश्चित्याश्चापि हिरण्मयाः । (११।१)

शोभार्थं विहितास्तत्र न तु दृष्टान्ततः कृताः ॥ (११।२)

यत्रेष्ट्वा स गतः सिद्धिं सहस्राक्षः शचीपतिः । (१२।१)

यत्र भूतपतिः सृष्ट्वा सर्वलोकान् सनातनः । (१२।२)

उपास्यते तिग्मतेजा वृतो भूतैः सहस्रशः । (१२।३)

यत्रेष्टं मुनिभिः सर्वैर् नारदाद्यैर् मुमुक्षुभिः ॥ (१२।४)

नरनारायणौ ब्रह्मा यमः स्थाणुश्च पञ्चमः । (१३।१)

उपासते यत्र सत्रं सहस्रयुगपर्यये ॥ (१३।२)

यत्रेष्टं वासुदेवेन सत्रैर् वर्षसहस्रकैः । (१४।१)

श्रद्दधानेन सततं शिष्टसम्प्रतिपत्तये ॥ (१४।२)

सुवर्णमालिनो यूपाश्चित्याश्चाप्यतिभास्वराः । (१५।१)

ददौ यत्र सहस्राणि प्रयुतानि च केशवः ॥ (१५।२)

तत्र गत्वा स जग्राह गदां शङ्खं च भारत । (१६।१)

तस्माद् गिरेर् उपादाय शिलाः सुरुचिराः शुभाः । (१६।२)

स्फाटिकं च सभाद्रव्यं यद् आसीद् वृषपर्वणः । (१६।३)

किंकरैः सह रक्षोभिर् अगृह्णात् सर्वम् एव तत् । (१६।४)

तद् अगृह्णान्मयस्तत्र गत्वा सर्वं महासुरः ॥ (१६।५)

तद् आहृत्य तु तां चक्रे सो ऽसुरो ऽप्रतिमां सभाम् । (१७।१)

विश्रुतां त्रिषु लोकेषु दिव्यां मणिमयीं शुभाम् ॥ (१७।२)

गदां च भीमसेनाय प्रवरां प्रददौ तदा । (१८।१)

देवदत्तं च पार्थाय ददौ शङ्खम् अनुत्तमम् । (१८।२)

यस्य शङ्खस्य नादेन भूतानि प्रचकम्पिरे ॥ (१८।३)

सभा तु सा महाराज शातकुम्भमयद्रुमा । (१९।१)

दश किष्कुसहस्राणि समन्ताद् आयताभवत् ॥ (१९।२)

यथा वह्नेर् यथार्कस्य सोमस्य च यथैव सा । (२०।१)

भ्राजमाना तथा दिव्या बभार परमं वपुः ॥ (२०।२)

प्रतिघ्नतीव प्रभया प्रभाम् अर्कस्य भास्वराम् । (२१।१)

प्रबभौ ज्वलमानेव दिव्या दिव्येन वर्चसा ॥ (२१।२)

नगमेघप्रतीकाशा दिवम् आवृत्य विष्ठिता । (२२।१)

आयता विपुला श्लक्ष्णा विपाप्मा विगतक्लमा ॥ (२२।२)

उत्तमद्रव्यसम्पन्ना मणिप्राकारमालिनी । (२३।१)

बहुरत्ना बहुधना सुकृता विश्वकर्मणा ॥ (२३।२)

न दाशार्ही सुधर्मा वा ब्रह्मणो वापि तादृशी । (२४।१)

आसीद् रूपेण सम्पन्ना यां चक्रे ऽप्रतिमां मयः । (२४।२)

शंभोर् वाथ महात्मनः । (२४।३)

अतीव रूपसम्पन्नाम् ॥ (२४।४)

तां स्म तत्र मयेनोक्ता रक्षन्ति च वहन्ति च । (२५।१)

सभाम् अष्टौ सहस्राणि किंकरा नाम राक्षसाः ॥ (२५।२)

अन्तरिक्षचरा घोरा महाकाया महाबलाः । (२६।१)

रक्ताक्षाः पिङ्गलाक्षाश्च शुक्तिकर्णाः प्रहारिणः ॥ (२६।२)

तस्यां सभायां नलिनीं चकाराप्रतिमां मयः । (२७।१)

वैडूर्यपत्रविततां मणिनालमयाम्बुजाम् ॥ (२७।२)

पद्मसौगन्धिकवतीं नानाद्विजगणायुताम् । (२८।१)

पुष्पितैः पङ्कजैश्चित्रां कूर्ममत्स्यैश्च शोभिताम् ॥ (२८।२)

सूपतीर्थाम् अकलुषां सर्वर्तुसलिलां शुभाम् । (२९।१)

मारुतेनैव चोद्धूतैर् मुक्ताबिन्दुभिर् आचिताम् । (२९।२)

महामणिशिलापट्टबद्धपर्यन्तवेदिकाम् ॥ (२९।३)

मणिरत्नचितां तां तु केचिद् अभ्येत्य पार्थिवाः । (३०।१)

दृष्ट्वापि नाभ्यजानन्त ते ऽज्ञानात् प्रपतन्त्युत ॥ (३०।२)

तां सभाम् अभितो नित्यं पुष्पवन्तो महाद्रुमाः । (३१।१)

आसन्नानाविधा नीलाः शीतच्छाया मनोरमाः ॥ (३१।२)

काननानि सुगन्धीनि पुष्करिण्यश्च सर्वशः । (३२।१)

हंसकारण्डवयुताश्चक्रवाकोपशोभिताः ॥ (३२।२)

जलजानां च माल्यानां स्थलजानां च सर्वशः । (३३।१)

मारुतो गन्धम् आदाय पाण्डवान् स्म निषेवते । (३३।२)

अष्टौ तानि सहस्राणि किंकरा नाम राक्षसाः । (३३।३)

अयस्मयप्रहरणाः शूलमुद्गरपाणयः । (३३।४)

उपगूढाः प्रनृत्यन्ति रमयन्ति स्म पाण्डवान् । (३३।५)

प्राकारेण परिक्षिप्तां रत्नजालविभूषिताम् ॥ (३३।६)

ईदृशीं तां सभां कृत्वा मासैः परिचतुर्दशैः । (३४।१)

निष्ठितां धर्मराजाय मयो राज्ञे न्यवेदयत् ॥ (३४।२)