धृतराष्ट्र उवाच । (१।१)

राजपुत्रैः परिवृतस्तथामात्यैश्च संजय । (१।२)

उपारोप्य रथे कर्णं निर्यातो मधुसूदनः ॥ (१।३)

किम् अब्रवीद् रथोपस्थे राधेयं परवीरहा । (२।१)

कानि सान्त्वानि गोविन्दः सूतपुत्रे प्रयुक्तवान् ॥ (२।२)

ओघमेघस्वनः काले यत् कृष्णः कर्णम् अब्रवीत् । (३।१)

मृदु वा यदि वा तीक्ष्णं तन्ममाचक्ष्व संजय ॥ (३।२)

संजय उवाच । (४।१)

आनुपूर्व्येण वाक्यानि श्लक्ष्णानि च मृदूनि च । (४।२)

प्रियाणि धर्मयुक्तानि सत्यानि च हितानि च ॥ (४।३)

हृदयग्रहणीयानि राधेयं मधुसूदनः । (५।१)

यान्यब्रवीद् अमेयात्मा तानि मे शृणु भारत ॥ (५।२)

वासुदेव उवाच । (६।१)

उपासितास्ते राधेय ब्राह्मणा वेदपारगाः । (६।२)

तत्त्वार्थं परिपृष्टाश्च नियतेनानसूयया ॥ (६।३)

त्वम् एव कर्ण जानासि वेदवादान् सनातनान् । (७।१)

त्वं ह्येव धर्मशास्त्रेषु सूक्ष्मेषु परिनिष्ठितः ॥ (७।२)

कानीनश्च सहोढश्च कन्यायां यश्च जायते । (८।१)

वोढारं पितरं तस्य प्राहुः शास्त्रविदो जनाः ॥ (८।२)

सो ऽसि कर्ण तथा जातः पाण्डोः पुत्रो ऽसि धर्मतः । (९।१)

निग्रहाद् धर्मशास्त्राणाम् एहि राजा भविष्यसि ॥ (९।२)

पितृपक्षे हि ते पार्था मातृपक्षे च वृष्णयः । (१०।१)

द्वौ पक्षावभिजानीहि त्वम् एतौ पुरुषर्षभ ॥ (१०।२)

मया सार्धम् इतो यातम् अद्य त्वां तात पाण्डवाः । (११।१)

अभिजानन्तु कौन्तेयं पूर्वजातं युधिष्ठिरात् ॥ (११।२)

पादौ तव ग्रहीष्यन्ति भ्रातरः पञ्च पाण्डवाः । (१२।१)

द्रौपदेयास्तथा पञ्च सौभद्रश्चापराजितः ॥ (१२।२)

राजानो राजपुत्राश्च पाण्डवार्थे समागताः । (१३।१)

पादौ तव ग्रहीष्यन्ति सर्वे चान्धकवृष्णयः ॥ (१३।२)

हिरण्मयांश्च ते कुम्भान् राजतान् पार्थिवांस्तथा । (१४।१)

ओषध्यः सर्वबीजानि सर्वरत्नानि वीरुधः ॥ (१४।२)

राजन्या राजकन्याश् चाप्य् आनयन्त्वभिषेचनम् । (१५।१)

षष्ठे च त्वां तथा काले द्रौपद्युपगमिष्यति ॥ (१५।२)

अद्य त्वाम् अभिषिञ्चन्तु चातुर्वैद्या द्विजातयः । (१६।१)

पुरोहितः पाण्डवानां व्याघ्रचर्मण्यवस्थितम् ॥ (१६।२)

तथैव भ्रातरः पञ्च पाण्डवाः पुरुषर्षभाः । (१७।१)

द्रौपदेयास्तथा पञ्च पाञ्चालाश्चेदयस्तथा ॥ (१७।२)

अहं च त्वाभिषेक्ष्यामि राजानं पृथिवीपतिम् । (१८।१)

युवराजो ऽस्तु ते राजा कुन्तीपुत्रो युधिष्ठिरः ॥ (१८।२)

गृहीत्वा व्यजनं श्वेतं धर्मात्मा संशितव्रतः । (१९।१)

उपान्वारोहतु रथं कुन्तीपुत्रो युधिष्ठिरः ॥ (१९।२)

छत्रं च ते महच्छ्वेतं भीमसेनो महाबलः । (२०।१)

अभिषिक्तस्य कौन्तेय कौन्तेयो धारयिष्यति ॥ (२०।२)

किङ्किणीशतनिर्घोषं वैयाघ्रपरिवारणम् । (२१।१)

रथं श्वेतहयैर् युक्तम् अर्जुनो वाहयिष्यति ॥ (२१।२)

अभिमन्युश्च ते नित्यं प्रत्यासन्नो भविष्यति । (२२।१)

नकुलः सहदेवश्च द्रौपदेयाश्च पञ्च ये ॥ (२२।२)

पाञ्चालास्त्वानुयास्यन्ति शिखण्डी च महारथः । (२३।१)

अहं च त्वानुयास्यामि सर्वे चान्धकवृष्णयः । (२३।२)

दाशार्हाः परिवारास्ते दाशार्णाश्च विशां पते ॥ (२३।३)

भुङ्क्ष्व राज्यं महाबाहो भ्रातृभिः सह पाण्डवैः । (२४।१)

जपैर् होमैश्च संयुक्तो मङ्गलैश्च पृथग्विधैः ॥ (२४।२)

पुरोगमाश्च ते सन्तु द्रविडाः सह कुन्तलैः । (२५।१)

आन्ध्रास्तालचराश्चैव चूचुपा वेणुपास्तथा ॥ (२५।२)

स्तुवन्तु त्वाद्य बहुशः स्तुतिभिः सूतमागधाः । (२६।१)

विजयं वसुषेणस्य घोषयन्तु च पाण्डवाः ॥ (२६।२)

स त्वं परिवृतः पार्थैर् नक्षत्रैर् इव चन्द्रमाः । (२७।१)

प्रशाधि राज्यं कौन्तेय कुन्तीं च प्रतिनन्दय ॥ (२७।२)

मित्राणि ते प्रहृष्यन्तु व्यथन्तु रिपवस्तथा । (२८।१)

सौभ्रात्रं चैव ते ऽद्यास्तु भ्रातृभिः सह पाण्डवैः ॥ (२८।२)