युधिष्ठिर उवाच । (१।१)

ऐश्वर्यं वा महत् प्राप्य धनं वा भरतर्षभ । (१।२)

दीर्घम् आयुर् अवाप्याथ कथं मृत्युम् अतिक्रमेत् ॥ (१।३)

तपसा वा सुमहता कर्मणा वा श्रुतेन वा । (२।१)

रसायनप्रयोगैर् वा कैर् नोपैति जरान्तकौ ॥ (२।२)

भीष्म उवाच । (३।१)

अत्राप्युदाहरन्तीमम् इतिहासं पुरातनम् । (३।२)

भिक्षोः पञ्चशिखस्येह संवादं जनकस्य च ॥ (३।३)

वैदेहो जनको राजा महर्षिं वेदवित्तमम् । (४।१)

पर्यपृच्छत् पञ्चशिखं छिन्नधर्मार्थसंशयम् ॥ (४।२)

केन वृत्तेन भगवन्न् अतिक्रामेज्जरान्तकौ । (५।१)

तपसा वाथ बुद्ध्या वा कर्मणा वा श्रुतेन वा ॥ (५।२)

एवम् उक्तः स वैदेहं प्रत्युवाच परोक्षवित् । (६।१)

निवृत्तिर् नैतयोर् अस्ति नानिवृत्तिः कथंचन ॥ (६।२)

न ह्यहानि निवर्तन्ते न मासा न पुनः क्षपाः । (७।१)

सो ऽयं प्रपद्यते ऽध्वानं चिराय ध्रुवम् अध्रुवः ॥ (७।२)

सर्वभूतसमुच्छेदः स्रोतसेवोह्यते सदा । (८।१)

उह्यमानं निमज्जन्तम् अप्लवे कालसागरे । (८।२)

जरामृत्युमहाग्राहे न कश्चिद् अभिपद्यते ॥ (८।३)

नैवास्य भविता कश्चिन्नासौ भवति कस्यचित् । (९।१)

पथि संगतम् एवेदं दारैर् अन्यैश्च बन्धुभिः । (९।२)

नायम् अत्यन्तसंवासो लब्धपूर्वो हि केनचित् ॥ (९।३)

क्षिप्यन्ते तेन तेनैव निष्टनन्तः पुनः पुनः । (१०।१)

कालेन जाता जाता हि वायुनेवाभ्रसंचयाः ॥ (१०।२)

जरामृत्यू हि भूतानां खादितारौ वृकाविव । (११।१)

बलिनां दुर्बलानां च ह्रस्वानां महताम् अपि ॥ (११।२)

एवंभूतेषु भूतेषु नित्यभूताध्रुवेषु च । (१२।१)

कथं हृष्येत जातेषु मृतेषु च कथं ज्वरेत् ॥ (१२।२)

कुतो ऽहम् आगतः को ऽस्मि क्व गमिष्यामि कस्य वा । (१३।१)

कस्मिन् स्थितः क्व भविता कस्मात् किम् अनुशोचसि ॥ (१३।२)

द्रष्टा स्वर्गस्य न ह्यस्ति तथैव नरकस्य च । (१४।१)

आगमांस्त्वनतिक्रम्य दद्याच्चैव यजेत च ॥ (१४।२)