युधिष्ठिर उवाच । (१।१)

उक्तं वै गोप्रदानं ते नाचिकेतम् ऋषिं प्रति । (१।२)

माहात्म्यम् अपि चैवोक्तम् उद्देशेन गवां प्रभो ॥ (१।३)

नृगेण च यथा दुःखम् अनुभूतं महात्मना । (२।१)

एकापराधाद् अज्ञानात् पितामह महामते ॥ (२।२)

द्वारवत्यां यथा चासौ निविशन्त्यां समुद्धृतः । (३।१)

मोक्षहेतुर् अभूत् कृष्णस्तद् अप्यवधृतं मया ॥ (३।२)

किं त्वस्ति मम संदेहो गवां लोकं प्रति प्रभो । (४।१)

तत्त्वतः श्रोतुम् इच्छामि गोदा यत्र विशन्त्युत ॥ (४।२)

भीष्म उवाच । (५।१)

अत्राप्युदाहरन्तीमम् इतिहासं पुरातनम् । (५।२)

यथापृच्छत् पद्मयोनिम् एतद् एव शतक्रतुः ॥ (५।३)

शक्र उवाच । (६।१)

स्वर्लोकवासिनां लक्ष्मीम् अभिभूय स्वया त्विषा । (६।२)

गोलोकवासिनः पश्ये व्रजतः संशयो ऽत्र मे ॥ (६।३)

कीदृशा भगवंल्लोका गवां तद् ब्रूहि मे ऽनघ । (७।१)

यान् आवसन्ति दातार एतद् इच्छामि वेदितुम् ॥ (७।२)

कीदृशाः किंफलाः कः स्वित् परमस्तत्र वै गुणः । (८।१)

कथं च पुरुषास्तत्र गच्छन्ति विगतज्वराः ॥ (८।२)

कियत् कालं प्रदानस्य दाता च फलम् अश्नुते । (९।१)

कथं बहुविधं दानं स्याद् अल्पम् अपि वा कथम् ॥ (९।२)

बह्वीनां कीदृशं दानम् अल्पानां वापि कीदृशम् । (१०।१)

अदत्त्वा गोप्रदाः सन्ति केन वा तच्च शंस मे ॥ (१०।२)

कथं च बहुदाता स्याद् अल्पदात्रा समः प्रभो । (११।१)

अल्पप्रदाता बहुदः कथं च स्याद् इहेश्वर ॥ (११।२)

कीदृशी दक्षिणा चैव गोप्रदाने विशिष्यते । (१२।१)

एतत् तथ्येन भगवन्मम शंसितुम् अर्हसि ॥ (१२।२)