व्यास उवाच । (१।१)

भद्रे द्रक्ष्यसि गान्धारि पुत्रान् भ्रातॄन् सखींस्तथा । (१।२)

वधूश्च पतिभिः सार्धं निशि सुप्तोत्थिता इव ॥ (१।३)

कर्णं द्रक्ष्यति कुन्ती च सौभद्रं चापि यादवी । (२।१)

द्रौपदी पञ्च पुत्रांश्च पितॄन् भ्रातॄंस्तथैव च ॥ (२।२)

पूर्वम् एवैष हृदये व्यवसायो ऽभवन्मम । (३।१)

यथास्मि चोदितो राज्ञा भवत्या पृथयैव च ॥ (३।२)

न ते शोच्या महात्मानः सर्व एव नरर्षभाः । (४।१)

क्षत्रधर्मपराः सन्तस्तथा हि निधनं गताः ॥ (४।२)

भवितव्यम् अवश्यं तत् सुरकार्यम् अनिन्दिते । (५।१)

अवतेरुस्ततः सर्वे देवभागैर् महीतलम् ॥ (५।२)

गन्धर्वाप्सरसश्चैव पिशाचा गुह्यराक्षसाः । (६।१)

तथा पुण्यजनाश्चैव सिद्धा देवर्षयो ऽपि च ॥ (६।२)

देवाश्च दानवाश्चैव तथा ब्रह्मर्षयो ऽमलाः । (७।१)

त एते निधनं प्राप्ताः कुरुक्षेत्रे रणाजिरे ॥ (७।२)

गन्धर्वराजो यो धीमान् धृतराष्ट्र इति श्रुतः । (८।१)

स एव मानुषे लोके धृतराष्ट्रः पतिस्तव ॥ (८।२)

पाण्डुं मरुद्गणं विद्धि विशिष्टतमम् अच्युतम् । (९।१)

धर्मस्यांशो ऽभवत् क्षत्ता राजा चायं युधिष्ठिरः ॥ (९।२)

कलिं दुर्योधनं विद्धि शकुनिं द्वापरं तथा । (१०।१)

दुःशासनादीन् विद्धि त्वं राक्षसाञ्शुभदर्शने ॥ (१०।२)

मरुद्गणाद् भीमसेनं बलवन्तम् अरिंदमम् । (११।१)

विद्धि च त्वं नरम् ऋषिम् इमं पार्थं धनंजयम् । (११।२)

नारायणं हृषीकेशम् अश्विनौ यमजावुभौ ॥ (११।३)

द्विधा कृत्वात्मनो देहम् आदित्यं तपतां वरम् । (१२।१)

लोकांश्च तापयानं वै विद्धि कर्णं च शोभने । (१२।२)

यश्च वैरार्थम् उद्भूतः संघर्षजननस्तथा ॥ (१२।३)

यश्च पाण्डवदायादो हतः षड्भिर् महारथैः । (१३।१)

स सोम इह सौभद्रो योगाद् एवाभवद् द्विधा ॥ (१३।२)

द्रौपद्या सह सम्भूतं धृष्टद्युम्नं च पावकात् । (१४।१)

अग्नेर् भागं शुभं विद्धि राक्षसं तु शिखण्डिनम् ॥ (१४।२)

द्रोणं बृहस्पतेर् भागं विद्धि द्रौणिं च रुद्रजम् । (१५।१)

भीष्मं च विद्धि गाङ्गेयं वसुं मानुषतां गतम् ॥ (१५।२)

एवम् एते महाप्राज्ञे देवा मानुष्यम् एत्य हि । (१६।१)

ततः पुनर् गताः स्वर्गं कृते कर्मणि शोभने ॥ (१६।२)

यच्च वो हृदि सर्वेषां दुःखम् एनच्चिरं स्थितम् । (१७।१)

तद् अद्य व्यपनेष्यामि परलोककृताद् भयात् ॥ (१७।२)

सर्वे भवन्तो गच्छन्तु नदीं भागीरथीं प्रति । (१८।१)

तत्र द्रक्ष्यथ तान् सर्वान् ये हतास्मिन् रणाजिरे ॥ (१८।२)

वैशंपायन उवाच । (१९।१)

इति व्यासस्य वचनं श्रुत्वा सर्वो जनस्तदा । (१९।२)

महता सिंहनादेन गङ्गाम् अभिमुखो ययौ ॥ (१९।३)

धृतराष्ट्रश्च सामात्यः प्रययौ सह पाण्डवैः । (२०।१)

सहितो मुनिशार्दूलैर् गन्धर्वैश्च समागतैः ॥ (२०।२)

ततो गङ्गां समासाद्य क्रमेण स जनार्णवः । (२१।१)

निवासम् अकरोत् सर्वो यथाप्रीति यथासुखम् ॥ (२१।२)

राजा च पाण्डवैः सार्धम् इष्टे देशे सहानुगः । (२२।१)

निवासम् अकरोद् धीमान् सस्त्रीवृद्धपुरःसरः ॥ (२२।२)

जगाम तद् अहश्चापि तेषां वर्षशतं यथा । (२३।१)

निशां प्रतीक्षमाणानां दिदृक्षूणां मृतान्नृपान् ॥ (२३।२)

अथ पुण्यं गिरिवरम् अस्तम् अभ्यगमद् रविः । (२४।१)

ततः कृताभिषेकास्ते नैशं कर्म समाचरन् ॥ (२४।२)