वैशंपायन उवाच । (१।१)

अभिषिक्तो महाप्राज्ञो राज्यं प्राप्य युधिष्ठिरः । (१।२)

दाशार्हं पुण्डरीकाक्षम् उवाच प्राञ्जलिः शुचिः ॥ (१।३)

तव कृष्ण प्रसादेन नयेन च बलेन च । (२।१)

बुद्ध्या च यदुशार्दूल तथा विक्रमणेन च ॥ (२।२)

पुनः प्राप्तम् इदं राज्यं पितृपैतामहं मया । (३।१)

नमस्ते पुण्डरीकाक्ष पुनः पुनर् अरिंदम ॥ (३।२)

त्वाम् एकम् आहुः पुरुषं त्वाम् आहुः सात्वतां पतिम् । (४।१)

नामभिस्त्वां बहुविधैः स्तुवन्ति परमर्षयः ॥ (४।२)

विश्वकर्मन्नमस्ते ऽस्तु विश्वात्मन् विश्वसंभव । (५।१)

विष्णो जिष्णो हरे कृष्ण वैकुण्ठ पुरुषोत्तम ॥ (५।२)

अदित्याः सप्तरात्रं तु पुराणे गर्भतां गतः । (६।१)

पृश्निगर्भस्त्वम् एवैकस् त्रियुगं त्वां वदन्त्यपि ॥ (६।२)

शुचिश्रवा हृषीकेशो घृतार्चिर् हंस उच्यसे । (७।१)

त्रिचक्षुः शम्भुर् एकस्त्वं विभुर् दामोदरो ऽपि च ॥ (७।२)

वराहो ऽग्निर् बृहद्भानुर् वृषणस्तार्क्ष्यलक्षणः । (८।१)

अनीकसाहः पुरुषः शिपिविष्ट उरुक्रमः ॥ (८।२)

वाचिष्ठ उग्रः सेनानीः सत्यो वाजसनिर् गुहः । (९।१)

अच्युतश्च्यावनो ऽरीणां संकृतिर् विकृतिर् वृषः ॥ (९।२)

कृतवर्त्मा त्वम् एवाद्रिर् वृषगर्भो वृषाकपिः । (१०।१)

सिन्धुक्षिद् ऊर्मिस्त्रिककुत् त्रिधामा त्रिवृद् अच्युतः ॥ (१०।२)

सम्राड् विराट् स्वराट् चैव सुरराड् धर्मदो भवः । (११।१)

विभुर् भूर् अभिभूः कृष्णः कृष्णवर्त्मा त्वम् एव च ॥ (११।२)

स्विष्टकृद् भिषगावर्तः कपिलस्त्वं च वामनः । (१२।१)

यज्ञो ध्रुवः पतंगश्च जयत्सेनस्त्वम् उच्यसे ॥ (१२।२)

शिखण्डी नहुषो बभ्रुर् दिवस्पृक् त्वं पुनर्वसुः । (१३।१)

सुबभ्रुर् उक्षो रुक्मस्त्वं सुषेणो दुन्दुभिस्तथा ॥ (१३।२)

गभस्तिनेमिः श्रीपद्मं पुष्करं पुष्पधारणः । (१४।१)

ऋभुर् विभुः सर्वसूक्ष्मस् त्वं सावित्रं च पठ्यसे ॥ (१४।२)

अम्भोनिधिस्त्वं ब्रह्मा त्वं पवित्रं धाम धन्व च । (१५।१)

हिरण्यगर्भं त्वाम् आहुः स्वधा स्वाहा च केशव ॥ (१५।२)

योनिस्त्वम् अस्य प्रलयश्च कृष्ण त्वम् एवेदं सृजसि विश्वम् अग्रे । (१६।१)

विश्वं चेदं त्वद्वशे विश्वयोने नमो ऽस्तु ते शार्ङ्गचक्रासिपाणे ॥ (१६।२)

एवं स्तुतो धर्मराजेन कृष्णः सभामध्ये प्रीतिमान् पुष्कराक्षः । (१७।१)

तम् अभ्यनन्दद् भारतं पुष्कलाभिर् वाग्भिर् ज्येष्ठं पाण्डवं यादवाग्र्यः ॥ (१७।२)