युधिष्ठिर उवाच । (१।१)

किम् उत्तरं तदा तौ स्म चक्रतुस्तेन भाषिते । (१।२)

ब्राह्मणो वाथ वा राजा तन्मे ब्रूहि पितामह ॥ (१।३)

अथवा तौ गतौ तत्र यद् एतत् कीर्तितं त्वया । (२।१)

संवादो वा तयोः को ऽभूत् किं वा तौ तत्र चक्रतुः ॥ (२।२)

भीष्म उवाच । (३।१)

तथेत्येवं प्रतिश्रुत्य धर्मं सम्पूज्य चाभिभो । (३।२)

यमं कालं च मृत्युं च स्वर्गं सम्पूज्य चार्हतः ॥ (३।३)

पूर्वं ये चापरे तत्र समेता ब्राह्मणर्षभाः । (४।१)

सर्वान् सम्पूज्य शिरसा राजानं सो ऽब्रवीद् वचः ॥ (४।२)

फलेनानेन संयुक्तो राजर्षे गच्छ पुण्यताम् । (५।१)

भवता चाभ्यनुज्ञातो जपेयं भूय एव हि ॥ (५।२)

वरश्च मम पूर्वं हि देव्या दत्तो महाबल । (६।१)

श्रद्धा ते जपतो नित्यं भवितेति विशां पते ॥ (६।२)

राजोवाच । (७।१)

यद्येवम् अफला सिद्धिः श्रद्धा च जपितुं तव । (७।२)

गच्छ विप्र मया सार्धं जापकं फलम् आप्नुहि ॥ (७।३)

ब्राह्मण उवाच । (८।१)

कृतः प्रयत्नः सुमहान् सर्वेषां संनिधाविह । (८।२)

सह तुल्यफलौ चावां गच्छावो यत्र नौ गतिः ॥ (८।३)

भीष्म उवाच । (९।१)

व्यवसायं तयोस्तत्र विदित्वा त्रिदशेश्वरः । (९।२)

सह देवैर् उपययौ लोकपालैस्तथैव च ॥ (९।३)

साध्या विश्वे ऽथ मरुतो ज्योतींषि सुमहान्ति च । (१०।१)

नद्यः शैलाः समुद्राश्च तीर्थानि विविधानि च ॥ (१०।२)

तपांसि संयोगविधिर् वेदाः स्तोभाः सरस्वती । (११।१)

नारदः पर्वतश्चैव विश्वावसुर् हहा हुहूः ॥ (११।२)

गन्धर्वश्चित्रसेनश्च परिवारगणैर् युतः । (१२।१)

नागाः सिद्धाश्च मुनयो देवदेवः प्रजापतिः । (१२।२)

विष्णुः सहस्रशीर्षश्च देवो ऽचिन्त्यः समागमत् ॥ (१२।३)

अवाद्यन्तान्तरिक्षे च भेर्यस्तूर्याणि चाभिभो । (१३।१)

पुष्पवर्षाणि दिव्यानि तत्र तेषां महात्मनाम् । (१३।२)

ननृतुश्चाप्सरःसंघास्तत्र तत्र समन्ततः ॥ (१३।३)

अथ स्वर्गस्तथा रूपी ब्राह्मणं वाक्यम् अब्रवीत् । (१४।१)

संसिद्धस्त्वं महाभाग त्वं च सिद्धस्तथा नृप ॥ (१४।२)

अथ तौ सहितौ राजन्न् अन्योन्येन विधानतः । (१५।१)

विषयप्रतिसंहारम् उभावेव प्रचक्रतुः ॥ (१५।२)

प्राणापानौ तथोदानं समानं व्यानम् एव च । (१६।१)

एवं तान्मनसि स्थाप्य दधतुः प्राणयोर् मनः ॥ (१६।२)

उपस्थितकृतौ तत्र नासिकाग्रम् अधो भ्रुवौ । (१७।१)

कुङ्कुण्यां चैव मनसा शनैर् धारयतः स्म तौ ॥ (१७।२)

निश्चेष्टाभ्यां शरीराभ्यां स्थिरदृष्टी समाहितौ । (१८।१)

जितासनौ तथाधाय मूर्धन्यात्मानम् एव च ॥ (१८।२)

तालुदेशम् अथोद्दाल्य ब्राह्मणस्य महात्मनः । (१९।१)

ज्योतिर्ज्वाला सुमहती जगाम त्रिदिवं तदा ॥ (१९।२)

हाहाकारस्ततो दिक्षु सर्वासु सुमहान् अभूत् । (२०।१)

तज्ज्योतिः स्तूयमानं स्म ब्रह्माणं प्राविशत् तदा ॥ (२०।२)

ततः स्वागतम् इत्याह तत् तेजः स पितामहः । (२१।१)

प्रादेशमात्रं पुरुषं प्रत्युद्गम्य विशां पते ॥ (२१।२)

भूयश्चैवापरं प्राह वचनं मधुरं स्म सः । (२२।१)

जापकैस्तुल्यफलता योगानां नात्र संशयः ॥ (२२।२)

योगस्य तावद् एतेभ्यः फलं प्रत्यक्षदर्शनम् । (२३।१)

जापकानां विशिष्टं तु प्रत्युत्थानं समाधिकम् ॥ (२३।२)

उष्यतां मयि चेत्युक्त्वाचेतयत् स ततः पुनः । (२४।१)

अथास्य प्रविवेशास्यं ब्राह्मणो विगतज्वरः ॥ (२४।२)

राजाप्येतेन विधिना भगवन्तं पितामहम् । (२५।१)

यथैव द्विजशार्दूलस्तथैव प्राविशत् तदा ॥ (२५।२)

स्वयंभुवम् अथो देवा अभिवाद्य ततो ऽब्रुवन् । (२६।१)

जापकार्थम् अयं यत्नस्तदर्थं वयम् आगताः ॥ (२६।२)

कृतपूजाविमौ तुल्यं त्वया तुल्यफलाविमौ । (२७।१)

योगजापकयोर् दृष्टं फलं सुमहद् अद्य वै । (२७।२)

सर्वांल् लोकान् अतीत्यैतौ गच्छेतां यत्र वाञ्छितम् ॥ (२७।३)

ब्रह्मोवाच । (२८।१)

महास्मृतिं पठेद् यस्तु तथैवानुस्मृतिं शुभाम् । (२८।२)

तावप्येतेन विधिना गच्छेतां मत्सलोकताम् ॥ (२८।३)

यश्च योगे भवेद् भक्तः सो ऽपि नास्त्यत्र संशयः । (२९।१)

विधिनानेन देहान्ते मम लोकान् अवाप्नुयात् । (२९।२)

गम्यतां साधयिष्यामि यथास्थानानि सिद्धये ॥ (२९।३)

भीष्म उवाच । (३०।१)

इत्युक्त्वा स तदा देवस्तत्रैवान्तरधीयत । (३०।२)

आमन्त्र्य तं ततो देवा ययुः स्वं स्वं निवेशनम् ॥ (३०।३)

ते च सर्वे महात्मानो धर्मं सत्कृत्य तत्र वै । (३१।१)

पृष्ठतो ऽनुययू राजन् सर्वे सुप्रीतमानसाः ॥ (३१।२)

एतत् फलं जापकानां गतिश्चैव प्रकीर्तिता । (३२।१)

यथाश्रुतं महाराज किं भूयः श्रोतुम् इच्छसि ॥ (३२।२)