युधिष्ठिर उवाच । (१।१)

प्रियः सर्वस्य लोकस्य सर्वसत्त्वाभिनन्दिता । (१।२)

गुणैः सर्वैर् उपेतश्च को न्वस्ति भुवि मानवः ॥ (१।३)

भीष्म उवाच । (२।१)

अत्र ते वर्तयिष्यामि पृच्छतो भरतर्षभ । (२।२)

उग्रसेनस्य संवादं नारदे केशवस्य च ॥ (२।३)

उग्रसेन उवाच । (३।१)

पश्य संकल्पते लोको नारदस्य प्रकीर्तने । (३।२)

मन्ये स गुणसम्पन्नो ब्रूहि तन्मम पृच्छतः ॥ (३।३)

वासुदेव उवाच । (४।१)

कुकुराधिप यान्मन्ये शृणु तान्मे विवक्षतः । (४।२)

नारदस्य गुणान् साधून् संक्षेपेण नराधिप ॥ (४।३)

न चारित्रनिमित्तो ऽस्याहंकारो देहपातनः । (५।१)

अभिन्नश्रुतचारित्रस्तस्मात् सर्वत्र पूजितः ॥ (५।२)

तपस्वी नारदो बाढं वाचि नास्य व्यतिक्रमः । (६।१)

कामाद् वा यदि वा लोभात् तस्मात् सर्वत्र पूजितः ॥ (६।२)

अध्यात्मविधितत्त्वज्ञः क्षान्तः शक्तो जितेन्द्रियः । (७।१)

ऋजुश्च सत्यवादी च तस्मात् सर्वत्र पूजितः ॥ (७।२)

तेजसा यशसा बुद्ध्या नयेन विनयेन च । (८।१)

जन्मना तपसा वृद्धस्तस्मात् सर्वत्र पूजितः ॥ (८।२)

सुखशीलः सुसंभोगः सुभोज्यः स्वादरः शुचिः । (९।१)

सुवाक्यश्चाप्यनीर्ष्यश्च तस्मात् सर्वत्र पूजितः ॥ (९।२)

कल्याणं कुरुते बाढं पापम् अस्मिन्न विद्यते । (१०।१)

न प्रीयते परान् अर्थैस्तस्मात् सर्वत्र पूजितः ॥ (१०।२)

वेदश्रुतिभिर् आख्यानैर् अर्थान् अभिजिगीषते । (११।१)

तितिक्षुर् अनवज्ञश्च तस्मात् सर्वत्र पूजितः ॥ (११।२)

समत्वाद्धि प्रियो नास्ति नाप्रियश्च कथंचन । (१२।१)

मनोऽनुकूलवादी च तस्मात् सर्वत्र पूजितः ॥ (१२।२)

बहुश्रुतश्चैत्रकथः पण्डितो ऽनलसो ऽशठः । (१३।१)

अदीनो ऽक्रोधनो ऽलुब्धस्तस्मात् सर्वत्र पूजितः ॥ (१३।२)

नार्थे न धर्मे कामे वा भूतपूर्वो ऽस्य विग्रहः । (१४।१)

दोषाश्चास्य समुच्छिन्नास्तस्मात् सर्वत्र पूजितः ॥ (१४।२)

दृढभक्तिर् अनिन्द्यात्मा श्रुतवान् अनृशंसवान् । (१५।१)

वीतसंमोहदोषश्च तस्मात् सर्वत्र पूजितः ॥ (१५।२)

असक्तः सर्वसङ्गेषु सक्तात्मेव च लक्ष्यते । (१६।१)

अदीर्घसंशयो वाग्मी तस्मात् सर्वत्र पूजितः ॥ (१६।२)

समाधिर् नास्य मानार्थे नात्मानं स्तौति कर्हिचित् । (१७।१)

अनीर्ष्युर् दृढसंभाषस्तस्मात् सर्वत्र पूजितः ॥ (१७।२)

लोकस्य विविधं वृत्तं प्रकृतेश्चाप्यकुत्सयन् । (१८।१)

संसर्गविद्याकुशलस्तस्मात् सर्वत्र पूजितः ॥ (१८।२)

नासूयत्यागमं कंचित् स्वं तपो नोपजीवति । (१९।१)

अवन्ध्यकालो वश्यात्मा तस्मात् सर्वत्र पूजितः ॥ (१९।२)

कृतश्रमः कृतप्रज्ञो न च तृप्तः समाधितः । (२०।१)

नियमस्थो ऽप्रमत्तश्च तस्मात् सर्वत्र पूजितः ॥ (२०।२)

सापत्रपश्च युक्तश्च सुनेयः श्रेयसे परैः । (२१।१)

अभेत्ता परगुह्यानां तस्मात् सर्वत्र पूजितः ॥ (२१।२)

न हृष्यत्यर्थलाभेषु नालाभेषु व्यथत्यपि । (२२।१)

स्थिरबुद्धिर् असक्तात्मा तस्मात् सर्वत्र पूजितः ॥ (२२।२)

तं सर्वगुणसम्पन्नं दक्षं शुचिम् अकातरम् । (२३।१)

कालज्ञं च नयज्ञं च कः प्रियं न करिष्यति ॥ (२३।२)