वैशंपायन उवाच । (१।१)

एवम् उक्तस्तु राज्ञा स धृतराष्ट्रेण धीमता । (१।२)

तूष्णीं बभूव मेधावी तम् उवाचाथ केशवः ॥ (१।३)

अतीव मनसा शोकः क्रियमाणो जनाधिप । (२।१)

संतापयति वैतस्य पूर्वप्रेतान् पितामहान् ॥ (२।२)

यजस्व विविधैर् यज्ञैर् बहुभिः स्वाप्तदक्षिणैः । (३।१)

देवांस्तर्पय सोमेन स्वधया च पितॄन् अपि ॥ (३।२)

त्वद्विधस्य महाबुद्धे नैतद् अद्योपपद्यते । (४।१)

विदितं वेदितव्यं ते कर्तव्यम् अपि ते कृतम् ॥ (४।२)

श्रुताश्च राजधर्मास्ते भीष्माद् भागीरथीसुतात् । (५।१)

कृष्णद्वैपायनाच्चैव नारदाद् विदुरात् तथा ॥ (५।२)

नेमाम् अर्हसि मूढानां वृत्तिं त्वम् अनुवर्तितुम् । (६।१)

पितृपैतामहीं वृत्तिम् आस्थाय धुरम् उद्वह ॥ (६।२)

युक्तं हि यशसा क्षत्रं स्वर्गं प्राप्तुम् असंशयम् । (७।१)

न हि कश्चन शूराणां निहतो ऽत्र पराङ्मुखः ॥ (७।२)

त्यज शोकं महाराज भवितव्यं हि तत् तथा । (८।१)

न शक्यास्ते पुनर् द्रष्टुं त्वया ह्यस्मिन् रणे हताः ॥ (८।२)

एतावद् उक्त्वा गोविन्दो धर्मराजं युधिष्ठिरम् । (९।१)

विरराम महातेजास्तम् उवाच युधिष्ठिरः ॥ (९।२)

गोविन्द मयि या प्रीतिस्तव सा विदिता मम । (१०।१)

सौहृदेन तथा प्रेम्णा सदा माम् अनुकम्पसे ॥ (१०।२)

प्रियं तु मे स्यात् सुमहत् कृतं चक्रगदाधर । (११।१)

श्रीमन् प्रीतेन मनसा सर्वं यादवनन्दन ॥ (११।२)

यदि माम् अनुजानीयाद् भवान् गन्तुं तपोवनम् । (१२।१)

न हि शान्तिं प्रपश्यामि घातयित्वा पितामहम् । (१२।२)

कर्णं च पुरुषव्याघ्रं संग्रामेष्वपलायिनम् ॥ (१२।३)

कर्मणा येन मुच्येयम् अस्मात् क्रूराद् अरिंदम । (१३।१)

कर्मणस्तद् विधत्स्वेह येन शुध्यति मे मनः ॥ (१३।२)

तम् एवंवादिनं व्यासस्ततः प्रोवाच धर्मवित् । (१४।१)

सान्त्वयन् सुमहातेजाः शुभं वचनम् अर्थवत् ॥ (१४।२)

अकृता ते मतिस्तात पुनर् बाल्येन मुह्यसे । (१५।१)

किम् आकाशे वयं सर्वे प्रलपाम मुहुर् मुहुः ॥ (१५।२)

विदिताः क्षत्रधर्मास्ते येषां युद्धेन जीविका । (१६।१)

यथा प्रवृत्तो नृपतिर् नाधिबन्धेन युज्यते ॥ (१६।२)

मोक्षधर्माश्च निखिला याथातथ्येन ते श्रुताः । (१७।१)

असकृच्चैव संदेहाश्छिन्नास्ते कामजा मया ॥ (१७।२)

अश्रद्दधानो दुर्मेधा लुप्तस्मृतिर् असि ध्रुवम् । (१८।१)

मैवं भव न ते युक्तम् इदम् अज्ञानम् ईदृशम् ॥ (१८।२)

प्रायश्चित्तानि सर्वाणि विदितानि च ते ऽनघ । (१९।१)

युद्धधर्माश्च ते सर्वे दानधर्माश्च ते श्रुताः ॥ (१९।२)

स कथं सर्वधर्मज्ञः सर्वागमविशारदः । (२०।१)

परिमुह्यसि भूयस्त्वम् अज्ञानाद् इव भारत ॥ (२०।२)