उत्तर उवाच । (१।१)

आस्थाय विपुलं वीर रथं सारथिना मया । (१।२)

कतमं यास्यसे ऽनीकम् उक्तो यास्याम्यहं त्वया ॥ (१।३)

अर्जुन उवाच । (२।१)

प्रीतो ऽस्मि पुरुषव्याघ्र न भयं विद्यते तव । (२।२)

सर्वान्नुदामि ते शत्रून् रणे रणविशारद ॥ (२।३)

स्वस्थो भव महाबुद्धे पश्य मां शत्रुभिः सह । (३।१)

युध्यमानं विमर्दे ऽस्मिन् कुर्वाणं भैरवं महत् ॥ (३।२)

एतान् सर्वान् उपासङ्गान् क्षिप्रं बध्नीहि मे रथे । (४।१)

एतं चाहर निस्त्रिंशं जातरूपपरिष्कृतम् । (४।२)

अहं वै कुरुभिर् योत्स्याम्य् अवजेष्यामि ते पशून् ॥ (४।३)

संकल्पपक्षविक्षेपं बाहुप्राकारतोरणम् । (५।१)

त्रिदण्डतूणसंबाधम् अनेकध्वजसंकुलम् ॥ (५।२)

ज्याक्षेपणं क्रोधकृतं नेमीनिनददुन्दुभि । (६।१)

नगरं ते मया गुप्तं रथोपस्थं भविष्यति ॥ (६।२)

अधिष्ठितो मया संख्ये रथो गाण्डीवधन्वना । (७।१)

अजेयः शत्रुसैन्यानां वैराटे व्येतु ते भयम् ॥ (७।२)

उत्तर उवाच । (८।१)

बिभेमि नाहम् एतेषां जानामि त्वां स्थिरं युधि । (८।२)

केशवेनापि संग्रामे साक्षाद् इन्द्रेण वा समम् ॥ (८।३)

इदं तु चिन्तयन्न् एव परिमुह्यामि केवलम् । (९।१)

निश्चयं चापि दुर्मेधा न गच्छामि कथंचन ॥ (९।२)

एवं वीराङ्गरूपस्य लक्षणैर् उचितस्य च । (१०।१)

केन कर्मविपाकेन क्लीबत्वम् इदम् आगतम् ॥ (१०।२)

मन्ये त्वां क्लीबवेषेण चरन्तं शूलपाणिनम् । (११।१)

गन्धर्वराजप्रतिमं देवं वापि शतक्रतुम् ॥ (११।२)

अर्जुन उवाच । (१२।१)

भ्रातुर् नियोगाज्ज्येष्ठस्य संवत्सरम् इदं व्रतम् । (१२।२)

चरामि ब्रह्मचर्यं वै सत्यम् एतद् ब्रवीमि ते ॥ (१२।३)

नास्मि क्लीबो महाबाहो परवान् धर्मसंयुतः । (१३।१)

समाप्तव्रतम् उत्तीर्णं विद्धि मां त्वं नृपात्मज ॥ (१३।२)

उत्तर उवाच । (१४।१)

परमो ऽनुग्रहो मे ऽद्य यत् प्रतर्को न मे वृथा । (१४।२)

न हीदृशाः क्लीबरूपा भवन्तीह नरोत्तमाः ॥ (१४।३)

सहायवान् अस्मि रणे युध्येयम् अमरैर् अपि । (१५।१)

साध्वसं तत् प्रनष्टं मे किं करोमि ब्रवीहि मे ॥ (१५।२)

अहं ते संग्रहीष्यामि हयाञ्शत्रुरथारुजः । (१६।१)

शिक्षितो ह्यस्मि सारथ्ये तीर्थतः पुरुषर्षभ ॥ (१६।२)

दारुको वासुदेवस्य यथा शक्रस्य मातलिः । (१७।१)

तथा मां विद्धि सारथ्ये शिक्षितं नरपुंगव ॥ (१७।२)

यस्य याते न पश्यन्ति भूमौ प्राप्तं पदं पदम् । (१८।१)

दक्षिणं यो धुरं युक्तः सुग्रीवसदृशो हयः ॥ (१८।२)

यो ऽयं धुरं धुर्यवरो वामं वहति शोभनः । (१९।१)

तं मन्ये मेघपुष्पस्य जवेन सदृशं हयम् ॥ (१९।२)

यो ऽयं काञ्चनसंनाहः पार्ष्णिं वहति शोभनः । (२०।१)

वामं सैन्यस्य मन्ये तं जवेन बलवत्तरम् ॥ (२०।२)

यो ऽयं वहति ते पार्ष्णिं दक्षिणाम् अञ्चितोद्यतः । (२१।१)

बलाहकाद् अपि मतः स जवे वीर्यवत्तरः ॥ (२१।२)

त्वाम् एवायं रथो वोढुं संग्रामे ऽर्हति धन्विनम् । (२२।१)

त्वं चेमं रथम् आस्थाय योद्धुम् अर्हो मतो मम ॥ (२२।२)

वैशंपायन उवाच । (२३।१)

ततो निर्मुच्य बाहुभ्यां वलयानि स वीर्यवान् । (२३।२)

चित्रे दुन्दुभिसंनादे प्रत्यमुञ्चत् तले शुभे ॥ (२३।३)

कृष्णान् भङ्गीमतः केशाञ्श्वेतेनोद्ग्रथ्य वाससा । (२४।१)

अधिज्यं तरसा कृत्वा गाण्डीवं व्याक्षिपद् धनुः ॥ (२४।२)

तस्य विक्षिप्यमाणस्य धनुषो ऽभून्महास्वनः । (२५।१)

यथा शैलस्य महतः शैलेनैवाभिजघ्नुषः ॥ (२५।२)

सनिर्घाताभवद् भूमिर् दिक्षु वायुर् ववौ भृशम् । (२६।१)

भ्रान्तद्विजं खं तदासीत् प्रकम्पितमहाद्रुमम् ॥ (२६।२)

तं शब्दं कुरवो ऽजानन् विस्फोटम् अशनेर् इव । (२७।१)

यद् अर्जुनो धनुःश्रेष्ठं बाहुभ्याम् आक्षिपद् रथे ॥ (२७।२)