इन्द्र उवाच । (१।१)

जानन् यो गाम् अपहरेद् विक्रीयाद् वार्थकारणात् । (१।२)

एतद् विज्ञातुम् इच्छामि का नु तस्य गतिर् भवेत् ॥ (१।३)

ब्रह्मोवाच । (२।१)

भक्षार्थं विक्रयार्थं वा ये ऽपहारं हि कुर्वते । (२।२)

दानार्थं वा ब्राह्मणाय तत्रेदं श्रूयतां फलम् ॥ (२।३)

विक्रयार्थं हि यो हिंस्याद् भक्षयेद् वा निरङ्कुशः । (३।१)

घातयानं हि पुरुषं ये ऽनुमन्येयुर् अर्थिनः ॥ (३।२)

घातकः खादको वापि तथा यश्चानुमन्यते । (४।१)

यावन्ति तस्या लोमानि तावद् वर्षाणि मज्जति ॥ (४।२)

ये दोषा यादृशाश्चैव द्विजयज्ञोपघातके । (५।१)

विक्रये चापहारे च ते दोषा वै स्मृताः प्रभो ॥ (५।२)

अपहृत्य तु यो गां वै ब्राह्मणाय प्रयच्छति । (६।१)

यावद् दाने फलं तस्यास्तावन्निरयम् ऋच्छति ॥ (६।२)

सुवर्णं दक्षिणाम् आहुर् गोप्रदाने महाद्युते । (७।१)

सुवर्णं परमं ह्युक्तं दक्षिणार्थम् असंशयम् ॥ (७।२)

गोप्रदानं तारयते सप्त पूर्वांस्तथा परान् । (८।१)

सुवर्णं दक्षिणां दत्त्वा तावद् द्विगुणम् उच्यते ॥ (८।२)

सुवर्णं परमं दानं सुवर्णं दक्षिणा परा । (९।१)

सुवर्णं पावनं शक्र पावनानां परं स्मृतम् ॥ (९।२)

कुलानां पावनं प्राहुर् जातरूपं शतक्रतो । (१०।१)

एषा मे दक्षिणा प्रोक्ता समासेन महाद्युते ॥ (१०।२)

भीष्म उवाच । (११।१)

एतत् पितामहेनोक्तम् इन्द्राय भरतर्षभ । (११।२)

इन्द्रो दशरथायाह रामायाह पिता तथा ॥ (११।३)

राघवो ऽपि प्रियभ्रात्रे लक्ष्मणाय यशस्विने । (१२।१)

ऋषिभ्यो लक्ष्मणेनोक्तम् अरण्ये वसता विभो ॥ (१२।२)

पारंपर्यागतं चेदम् ऋषयः संशितव्रताः । (१३।१)

दुर्धरं धारयामासू राजानश्चैव धार्मिकाः । (१३।२)

उपाध्यायेन गदितं मम चेदं युधिष्ठिर ॥ (१३।३)

य इदं ब्राह्मणो नित्यं वदेद् ब्राह्मणसंसदि । (१४।१)

यज्ञेषु गोप्रदानेषु द्वयोर् अपि समागमे ॥ (१४।२)

तस्य लोकाः किलाक्षय्या दैवतैः सह नित्यदा । (१५।१)

इति ब्रह्मा स भगवान् उवाच परमेश्वरः ॥ (१५।२)