युधिष्ठिर उवाच । (१।१)

यौ तु स्यातां चरणेनोपपन्नौ यौ विद्यया सदृशौ जन्मना च । (१।२)

ताभ्यां दानं कतरस्मै विशिष्टम् अयाचमानाय च याचते च ॥ (१।३)

भीष्म उवाच । (२।१)

श्रेयो वै याचतः पार्थ दत्तम् आहुर् अयाचते । (२।२)

अर्हत्तमो वै धृतिमान् कृपणाद् अधृतात्मनः ॥ (२।३)

क्षत्रियो रक्षणधृतिर् ब्राह्मणो ऽनर्थनाधृतिः । (३।१)

ब्राह्मणो धृतिमान् विद्वान् देवान् प्रीणाति तुष्टिमान् ॥ (३।२)

याच्ञाम् आहुर् अनीशस्य अभिहारं च भारत । (४।१)

उद्वेजयति याचन् हि सदा भूतानि दस्युवत् ॥ (४।२)

म्रियते याचमानो वै तम् अनु म्रियते ददत् । (५।१)

ददत् संजीवयत्येनम् आत्मानं च युधिष्ठिर ॥ (५।२)

आनृशंस्यं परो धर्मो याचते यत् प्रदीयते । (६।१)

अयाचतः सीदमानान् सर्वोपायैर् निमन्त्रय ॥ (६।२)

यदि वै तादृशा राष्ट्रे वसेयुस्ते द्विजोत्तमाः । (७।१)

भस्मच्छन्नान् इवाग्नींस्तान् बुध्येथास्त्वं प्रयत्नतः ॥ (७।२)

तपसा दीप्यमानास्ते दहेयुः पृथिवीम् अपि । (८।१)

पूज्या हि ज्ञानविज्ञानतपोयोगसमन्विताः ॥ (८।२)

तेभ्यः पूजां प्रयुञ्जीथा ब्राह्मणेभ्यः परंतप । (९।१)

ददद् बहुविधान् दायान् उपच्छन्दान् अयाचताम् ॥ (९।२)

यद् अग्निहोत्रे सुहुते सायं प्रातर् भवेत् फलम् । (१०।१)

विद्यावेदव्रतवति तद् दानफलम् उच्यते ॥ (१०।२)

विद्यावेदव्रतस्नातान् अव्यपाश्रयजीविनः । (११।१)

गूढस्वाध्यायतपसो ब्राह्मणान् संशितव्रतान् ॥ (११।२)

कृतैर् आवसथैर् हृद्यैः सप्रेष्यैः सपरिच्छदैः । (१२।१)

निमन्त्रयेथाः कौन्तेय कामैश्चान्यैर् द्विजोत्तमान् ॥ (१२।२)

अपि ते प्रतिगृह्णीयुः श्रद्धापूतं युधिष्ठिर । (१३।१)

कार्यम् इत्येव मन्वाना धर्मज्ञाः सूक्ष्मदर्शिनः ॥ (१३।२)

अपि ते ब्राह्मणा भुक्त्वा गताः सोद्धरणान् गृहान् । (१४।१)

येषां दाराः प्रतीक्षन्ते पर्जन्यम् इव कर्षकाः ॥ (१४।२)

अन्नानि प्रातःसवने नियता ब्रह्मचारिणः । (१५।१)

ब्राह्मणास्तात भुञ्जानास्त्रेताग्नीन् प्रीणयन्तु ते ॥ (१५।२)

माध्यंदिनं ते सवनं ददतस्तात वर्तताम् । (१६।१)

गा हिरण्यानि वासांसि तेनेन्द्रः प्रीयतां तव ॥ (१६।२)

तृतीयं सवनं तत् ते वैश्वदेवं युधिष्ठिर । (१७।१)

यद् देवेभ्यः पितृभ्यश्च विप्रेभ्यश्च प्रयच्छसि ॥ (१७।२)

अहिंसा सर्वभूतेभ्यः संविभागश्च सर्वशः । (१८।१)

दमस्त्यागो धृतिः सत्यं भवत्ववभृथाय ते ॥ (१८।२)

एष ते विततो यज्ञः श्रद्धापूतः सदक्षिणः । (१९।१)

विशिष्टः सर्वयज्ञेभ्यो नित्यं तात प्रवर्तताम् ॥ (१९।२)