सूर्य उवाच । (१।१)

नैष देवो ऽनिलसखो नासुरो न च पन्नगः । (१।२)

उञ्छवृत्तिव्रते सिद्धो मुनिर् एष दिवं गतः ॥ (१।३)

एष मूलफलाहारः शीर्णपर्णाशनस्तथा । (२।१)

अब्भक्षो वायुभक्षश्च आसीद् विप्रः समाहितः ॥ (२।२)

ऋचश्चानेन विप्रेण संहितान्तरभिष्टुताः । (३।१)

स्वर्गद्वारकृतोद्योगो येनासौ त्रिदिवं गतः ॥ (३।२)

असन्नधीरनाकाङ्क्षी नित्यम् उञ्छशिलाशनः । (४।१)

सर्वभूतहिते युक्त एष विप्रो भुजंगम ॥ (४।२)

न हि देवा न गन्धर्वा नासुरा न च पन्नगाः । (५।१)

प्रभवन्तीह भूतानां प्राप्तानां परमां गतिम् ॥ (५।२)

नाग उवाच । (६।१)

एतद् एवंविधं दृष्टम् आश्चर्यं तत्र मे द्विज । (६।२)

संसिद्धो मानुषः कायो यो ऽसौ सिद्धगतिं गतः । (६।३)

सूर्येण सहितो ब्रह्मन् पृथिवीं परिवर्तते ॥ (६।४)