मार्कण्डेय उवाच । (१।१)

प्राप्तम् अप्रतिमं दुःखं रामेण भरतर्षभ । (१।२)

रक्षसा जानकी तस्य हृता भार्या बलीयसा ॥ (१।३)

आश्रमाद् राक्षसेन्द्रेण रावणेन विहायसा । (२।१)

मायाम् आस्थाय तरसा हत्वा गृध्रं जटायुषम् ॥ (२।२)

प्रत्याजहार तां रामः सुग्रीवबलम् आश्रितः । (३।१)

बद्ध्वा सेतुं समुद्रस्य दग्ध्वा लङ्कां शितैः शरैः ॥ (३।२)

युधिष्ठिर उवाच । (४।१)

कस्मिन् रामः कुले जातः किंवीर्यः किंपराक्रमः । (४।२)

रावणः कस्य वा पुत्रः किं वैरं तस्य तेन ह ॥ (४।३)

एतन् मे भगवन् सर्वं सम्यग् आख्यातुम् अर्हसि । (५।१)

श्रोतुम् इच्छामि चरितं रामस्याक्लिष्टकर्मणः ॥ (५।२)

मार्कण्डेय उवाच । (६।१)

अजो नामाभवद् राजा महान् इक्ष्वाकुवंशजः । (६।२)

तस्य पुत्रो दशरथः शश्वत् स्वाध्यायवाञ्शुचिः ॥ (६।३)

अभवंस्तस्य चत्वारः पुत्रा धर्मार्थकोविदाः । (७।१)

रामलक्ष्मणशत्रुघ्ना भरतश् च महाबलः ॥ (७।२)

रामस्य माता कौसल्या कैकेयी भरतस्य तु । (८।१)

सुतौ लक्ष्मणशत्रुघ्नौ सुमित्रायाः परंतपौ ॥ (८।२)

विदेहराजो जनकः सीता तस्यात्मजा विभो । (९।१)

यां चकार स्वयं त्वष्टा रामस्य महिषीं प्रियाम् ॥ (९।२)

एतद् रामस्य ते जन्म सीतायाश्च प्रकीर्तितम् । (१०।१)

रावणस्यापि ते जन्म व्याख्यास्यामि जनेश्वर ॥ (१०।२)

पितामहो रावणस्य साक्षाद् देवः प्रजापतिः । (११।१)

स्वयम्भूः सर्वलोकानां प्रभुः स्रष्टा महातपाः ॥ (११।२)

पुलस्त्यो नाम तस्यासीन् मानसो दयितः सुतः । (१२।१)

तस्य वैश्रवणो नाम गवि पुत्रो ऽभवत् प्रभुः ॥ (१२।२)

पितरं स समुत्सृज्य पितामहम् उपस्थितः । (१३।१)

तस्य कोपात् पिता राजन् ससर्जात्मानम् आत्मना ॥ (१३।२)

स जज्ञे विश्रवा नाम तस्यात्मार्धेन वै द्विजः । (१४।१)

प्रतीकाराय सक्रोधस् ततो वैश्रवणस्य वै ॥ (१४।२)

पितामहस् तु प्रीतात्मा ददौ वैश्रवणस्य ह । (१५।१)

अमरत्वं धनेशत्वं लोकपालत्वम् एव च ॥ (१५।२)

ईशानेन तथा सख्यं पुत्रं च नलकूबरम् । (१६।१)

राजधानीनिवेशं च लङ्कां रक्षोगणान्विताम् ॥ (१६।२)