संजय उवाच । (१।१)

ततो युधिष्ठिरो राजा स्वां सेनां समचोदयत् । (१।२)

प्रतिव्यूहन्न् अनीकानि भीष्मस्य भरतर्षभ ॥ (१।३)

यथोद्दिष्टान्यनीकानि प्रत्यव्यूहन्त पाण्डवाः । (२।१)

स्वर्गं परम् अभीप्सन्तः सुयुद्धेन कुरूद्वहाः ॥ (२।२)

मध्ये शिखण्डिनो ऽनीकं रक्षितं सव्यसाचिना । (३।१)

धृष्टद्युम्नस्य च स्वयं भीमेन परिपालितम् ॥ (३।२)

अनीकं दक्षिणं राजन् युयुधानेन पालितम् । (४।१)

श्रीमता सात्वताग्र्येण शक्रेणेव धनुष्मता ॥ (४।२)

महेन्द्रयानप्रतिमं रथं तु सोपस्करं हाटकरत्नचित्रम् । (५।१)

युधिष्ठिरः काञ्चनभाण्डयोक्त्रं समास्थितो नागकुलस्य मध्ये ॥ (५।२)

समुच्छ्रितं दान्तशलाकम् अस्य सुपाण्डुरं छत्रम् अतीव भाति । (६।१)

प्रदक्षिणं चैनम् उपाचरन्ति महर्षयः संस्तुतिभिर् नरेन्द्रम् ॥ (६।२)

पुरोहिताः शत्रुवधं वदन्तो महर्षिवृद्धाः श्रुतवन्त एव । (७।१)

जप्यैश्च मन्त्रैश्च तथौषधीभिः समन्ततः स्वस्त्ययनं प्रचक्रुः ॥ (७।२)

ततः स वस्त्राणि तथैव गाश्च फलानि पुष्पाणि तथैव निष्कान् । (८।१)

कुरूत्तमो ब्राह्मणसान्महात्मा कुर्वन् ययौ शक्र इवामरेभ्यः ॥ (८।२)

सहस्रसूर्यः शतकिङ्किणीकः परार्ध्यजाम्बूनदहेमचित्रः । (९।१)

रथो ऽर्जुनस्याग्निर् इवार्चिमाली विभ्राजते श्वेतहयः सुचक्रः ॥ (९।२)

तम् आस्थितः केशवसंगृहीतं कपिध्वजं गाण्डिवबाणहस्तः । (१०।१)

धनुर्धरो यस्य समः पृथिव्यां न विद्यते नो भविता वा कदाचित् ॥ (१०।२)

उद्वर्तयिष्यंस्तव पुत्रसेनाम् अतीव रौद्रं स बिभर्ति रूपम् । (११।१)

अनायुधो यः सुभुजो भुजाभ्यां नराश्वनागान् युधि भस्म कुर्यात् ॥ (११।२)

स भीमसेनः सहितो यमाभ्यां वृकोदरो वीररथस्य गोप्ता । (१२।१)

तं प्रेक्ष्य मत्तर्षभसिंहखेलं लोके महेन्द्रप्रतिमानकल्पम् ॥ (१२।२)

समीक्ष्य सेनाग्रगतं दुरासदं प्रविव्यथुः पङ्कगता इवोष्ट्राः । (१३।१)

वृकोदरं वारणराजदर्पं योधास्त्वदीया भयविग्नसत्त्वाः ॥ (१३।२)

अनीकमध्ये तिष्ठन्तं राजपुत्रं दुरासदम् । (१४।१)

अब्रवीद् भरतश्रेष्ठं गुडाकेशं जनार्दनः ॥ (१४।२)

वासुदेव उवाच । (१५।१)

य एष गोप्ता प्रतपन् बलस्थो यो नः सेनां सिंह इवेक्षते च । (१५।२)

स एष भीष्मः कुरुवंशकेतुर् येनाहृतास्त्रिंशतो वाजिमेधाः ॥ (१५।३)

एतान्यनीकानि महानुभावं गूहन्ति मेघा इव घर्मरश्मिम् । (१६।१)

एतानि हत्वा पुरुषप्रवीर काङ्क्षस्व युद्धं भरतर्षभेण ॥ (१६।२)

धृतराष्ट्र उवाच । (१७।१)

केषां प्रहृष्टास्तत्राग्रे योधा युध्यन्ति संजय । (१७।२)

उदग्रमनसः के ऽत्र के वा दीना विचेतसः ॥ (१७।३)

के पूर्वं प्राहरंस्तत्र युद्धे हृदयकम्पने । (१८।१)

मामकाः पाण्डवानां वा तन्ममाचक्ष्व संजय ॥ (१८।२)

कस्य सेनासमुदये गन्धमाल्यसमुद्भवः । (१९।१)

वाचः प्रदक्षिणाश्चैव योधानाम् अभिगर्जताम् ॥ (१९।२)

संजय उवाच । (२०।१)

उभयोः सेनयोस्तत्र योधा जहृषिरे मुदा । (२०।२)

स्रग्धूपपानगन्धानाम् उभयत्र समुद्भवः ॥ (२०।३)

संहतानाम् अनीकानां व्यूढानां भरतर्षभ । (२१।१)

संसर्पताम् उदीर्णानां विमर्दः सुमहान् अभूत् ॥ (२१।२)

वादित्रशब्दस्तुमुलः शङ्खभेरीविमिश्रितः । (२२।१)

कुञ्जराणां च नदतां सैन्यानां च प्रहृष्यताम् ॥ (२२।२)