कृप उवाच । (१।१)

सदैव तव राधेय युद्धे क्रूरतरा मतिः । (१।२)

नार्थानां प्रकृतिं वेत्थ नानुबन्धम् अवेक्षसे ॥ (१।३)

नया हि बहवः सन्ति शास्त्राण्याश्रित्य चिन्तिताः । (२।१)

तेषां युद्धं तु पापिष्ठं वेदयन्ति पुराविदः ॥ (२।२)

देशकालेन संयुक्तं युद्धं विजयदं भवेत् । (३।१)

हीनकालं तद् एवेह फलवन्न भवत्युत । (३।२)

देशे काले च विक्रान्तं कल्याणाय विधीयते ॥ (३।३)

आनुकूल्येन कार्याणाम् अन्तरं संविधीयताम् । (४।१)

भारं हि रथकारस्य न व्यवस्यन्ति पण्डिताः ॥ (४।२)

परिचिन्त्य तु पार्थेन संनिपातो न नः क्षमः । (५।१)

एकः कुरून् अभ्यरक्षद् एकश्चाग्निम् अतर्पयत् ॥ (५।२)

एकश्च पञ्च वर्षाणि ब्रह्मचर्यम् अधारयत् । (६।१)

एकः सुभद्राम् आरोप्य द्वैरथे कृष्णम् आह्वयत् । (६।२)

अस्मिन्न् एव वने कृष्णो हृतां कृष्णाम् अवाजयत् ॥ (६।३)

एकश्च पञ्च वर्षाणि शक्राद् अस्त्राण्यशिक्षत । (७।१)

एकः सांयमिनीं जित्वा कुरूणाम् अकरोद् यशः ॥ (७।२)

एको गन्धर्वराजानं चित्रसेनम् अरिंदमः । (८।१)

विजिग्ये तरसा संख्ये सेनां चास्य सुदुर्जयाम् ॥ (८।२)

तथा निवातकवचाः कालखञ्जाश्च दानवाः । (९।१)

दैवतैर् अप्यवध्यास्ते एकेन युधि पातिताः ॥ (९।२)

एकेन हि त्वया कर्ण किं नामेह कृतं पुरा । (१०।१)

एकैकेन यथा तेषां भूमिपाला वशीकृताः ॥ (१०।२)

इन्द्रो ऽपि हि न पार्थेन संयुगे योद्धुम् अर्हति । (११।१)

यस्तेनाशंसते योद्धुं कर्तव्यं तस्य भेषजम् ॥ (११।२)

आशीविषस्य क्रुद्धस्य पाणिम् उद्यम्य दक्षिणम् । (१२।१)

अविमृश्य प्रदेशिन्या दंष्ट्राम् आदातुम् इच्छसि ॥ (१२।२)

अथवा कुञ्जरं मत्तम् एक एव चरन् वने । (१३।१)

अनङ्कुशं समारुह्य नगरं गन्तुम् इच्छसि ॥ (१३।२)

समिद्धं पावकं वापि घृतमेदोवसाहुतम् । (१४।१)

घृताक्तश्चीरवासास्त्वं मध्येनोत्तर्तुम् इच्छसि ॥ (१४।२)

आत्मानं यः समुद्बध्य कण्ठे बद्ध्वा महाशिलाम् । (१५।१)

समुद्रं प्रतरेद् दोर्भ्यां तत्र किं नाम पौरुषम् ॥ (१५।२)

अकृतास्त्रः कृतास्त्रं वै बलवन्तं सुदुर्बलः । (१६।१)

तादृशं कर्ण यः पार्थं योद्धुम् इच्छेत् स दुर्मतिः ॥ (१६।२)

अस्माभिर् एष निकृतो वर्षाणीह त्रयोदश । (१७।१)

सिंहः पाशविनिर्मुक्तो न नः शेषं करिष्यति ॥ (१७।२)

एकान्ते पार्थम् आसीनं कूपे ऽग्निम् इव संवृतम् । (१८।१)

अज्ञानाद् अभ्यवस्कन्द्य प्राप्ताः स्मो भयम् उत्तमम् ॥ (१८।२)

सह युध्यामहे पार्थम् आगतं युद्धदुर्मदम् । (१९।१)

सैन्यास्तिष्ठन्तु संनद्धा व्यूढानीकाः प्रहारिणः ॥ (१९।२)

द्रोणो दुर्योधनो भीष्मो भवान् द्रौणिस्तथा वयम् । (२०।१)

सर्वे युध्यामहे पार्थं कर्ण मा साहसं कृथाः ॥ (२०।२)

वयं व्यवसितं पार्थं वज्रपाणिम् इवोद्यतम् । (२१।१)

षड्रथाः प्रतियुध्येम तिष्ठेम यदि संहताः ॥ (२१।२)

व्यूढानीकानि सैन्यानि यत्ताः परमधन्विनः । (२२।१)

युध्यामहे ऽर्जुनं संख्ये दानवा वासवं यथा ॥ (२२।२)