शिशुपाल उवाच । (१।१)

नायम् अर्हति वार्ष्णेयस्तिष्ठत्स्विह महात्मसु । (१।२)

महीपतिषु कौरव्य राजवत् पार्थिवार्हणम् ॥ (१।३)

नायं युक्तः समाचारः पाण्डवेषु महात्मसु । (२।१)

यत् कामात् पुण्डरीकाक्षं पाण्डवार्चितवान् असि ॥ (२।२)

बाला यूयं न जानीध्वं धर्मः सूक्ष्मो हि पाण्डवाः । (३।१)

अयं तत्राभ्यतिक्रान्त आपगेयो ऽल्पदर्शनः ॥ (३।२)

त्वादृशो धर्मयुक्तो हि कुर्वाणः प्रियकाम्यया । (४।१)

भवत्यभ्यधिकं भीष्मो लोकेष्ववमतः सताम् ॥ (४।२)

कथं ह्यराजा दाशार्हो मध्ये सर्वमहीक्षिताम् । (५।१)

अर्हणाम् अर्हति तथा यथा युष्माभिर् अर्चितः ॥ (५।२)

अथ वा मन्यसे कृष्णं स्थविरं भरतर्षभ । (६।१)

वसुदेवे स्थिते वृद्धे कथम् अर्हति तत्सुतः ॥ (६।२)

अथ वा वासुदेवो ऽपि प्रियकामो ऽनुवृत्तवान् । (७।१)

द्रुपदे तिष्ठति कथं माधवो ऽर्हति पूजनम् ॥ (७।२)

आचार्यं मन्यसे कृष्णम् अथ वा कुरुपुंगव । (८।१)

द्रोणे तिष्ठति वार्ष्णेयं कस्माद् अर्चितवान् असि ॥ (८।२)

ऋत्विजं मन्यसे कृष्णम् अथ वा कुरुनन्दन । (९।१)

द्वैपायने स्थिते विप्रे कथं कृष्णो ऽर्चितस्त्वया ॥ (९।२)

नैव ऋत्विङ् न चाचार्यो न राजा मधुसूदनः । (१०।१)

अर्चितश्च कुरुश्रेष्ठ किम् अन्यत् प्रियकाम्यया ॥ (१०।२)

अथ वाप्यर्चनीयो ऽयं युष्माकं मधुसूदनः । (११।१)

किं राजभिर् इहानीतैर् अवमानाय भारत ॥ (११।२)

वयं तु न भयाद् अस्य कौन्तेयस्य महात्मनः । (१२।१)

प्रयच्छामः करान् सर्वे न लोभान्न च सान्त्वनात् ॥ (१२।२)

अस्य धर्मप्रवृत्तस्य पार्थिवत्वं चिकीर्षतः । (१३।१)

करान् अस्मै प्रयच्छामः सो ऽयम् अस्मान्न मन्यते ॥ (१३।२)

किम् अन्यद् अवमानाद्धि यद् इमं राजसंसदि । (१४।१)

अप्राप्तलक्षणं कृष्णम् अर्घ्येणार्चितवान् असि ॥ (१४।२)

अकस्माद् धर्मपुत्रस्य धर्मात्मेति यशो गतम् । (१५।१)

को हि धर्मच्युते पूजाम् एवं युक्तां प्रयोजयेत् । (१५।२)

यो ऽयं वृष्णिकुले जातो राजानं हतवान् पुरा ॥ (१५।३)

अद्य धर्मात्मता चैव व्यपकृष्टा युधिष्ठिरात् । (१६।१)

कृपणत्वं निविष्टं च कृष्णे ऽर्घ्यस्य निवेदनात् ॥ (१६।२)

यदि भीताश्च कौन्तेयाः कृपणाश्च तपस्विनः । (१७।१)

ननु त्वयापि बोद्धव्यं यां पूजां माधवो ऽर्हति ॥ (१७।२)

अथ वा कृपणैर् एताम् उपनीतां जनार्दन । (१८।१)

पूजाम् अनर्हः कस्मात् त्वम् अभ्यनुज्ञातवान् असि ॥ (१८।२)

अयुक्ताम् आत्मनः पूजां त्वं पुनर् बहु मन्यसे । (१९।१)

हविषः प्राप्य निष्यन्दं प्राशितुं श्वेव निर्जने ॥ (१९।२)

न त्वयं पार्थिवेन्द्राणाम् अवमानः प्रयुज्यते । (२०।१)

त्वाम् एव कुरवो व्यक्तं प्रलम्भन्ते जनार्दन ॥ (२०।२)

क्लीबे दारक्रिया यादृग् अन्धे वा रूपदर्शनम् । (२१।१)

अराज्ञो राजवत् पूजा तथा ते मधुसूदन ॥ (२१।२)

दृष्टो युधिष्ठिरो राजा दृष्टो भीष्मश्च यादृशः । (२२।१)

वासुदेवो ऽप्ययं दृष्टः सर्वम् एतद् यथातथम् ॥ (२२।२)

इत्युक्त्वा शिशुपालस्तान् उत्थाय परमासनात् । (२३।१)

निर्ययौ सदसस्तस्मात् सहितो राजभिस्तदा ॥ (२३।२)