ब्रह्मोवाच । (१।१)

अतः परं प्रवक्ष्यामि तृतीयं गुणम् उत्तमम् । (१।२)

सर्वभूतहितं लोके सतां धर्मम् अनिन्दितम् ॥ (१।३)

आनन्दः प्रीतिर् उद्रेकः प्राकाश्यं सुखम् एव च । (२।१)

अकार्पण्यम् असंरम्भः संतोषः श्रद्दधानता ॥ (२।२)

क्षमा धृतिर् अहिंसा च समता सत्यम् आर्जवम् । (३।१)

अक्रोधश्चानसूया च शौचं दाक्ष्यं पराक्रमः ॥ (३।२)

मुधा ज्ञानं मुधा वृत्तं मुधा सेवा मुधा श्रमः । (४।१)

एवं यो युक्तधर्मः स्यात् सो ऽमुत्रानन्त्यम् अश्नुते ॥ (४।२)

निर्ममो निरहंकारो निराशीः सर्वतः समः । (५।१)

अकामहत इत्येष सतां धर्मः सनातनः ॥ (५।२)

विश्रम्भो ह्रीस्तितिक्षा च त्यागः शौचम् अतन्द्रिता । (६।१)

आनृशंस्यम् असंमोहो दया भूतेष्वपैशुनम् ॥ (६।२)

हर्षस्तुष्टिर् विस्मयश्च विनयः साधुवृत्तता । (७।१)

शान्तिकर्म विशुद्धिश्च शुभा बुद्धिर् विमोचनम् ॥ (७।२)

उपेक्षा ब्रह्मचर्यं च परित्यागश्च सर्वशः । (८।१)

निर्ममत्वम् अनाशीस्त्वम् अपरिक्रीतधर्मता ॥ (८।२)

मुधा दानं मुधा यज्ञो मुधाधीतं मुधा व्रतम् । (९।१)

मुधा प्रतिग्रहश्चैव मुधा धर्मो मुधा तपः ॥ (९।२)

एवंवृत्तास्तु ये केचिल् लोके ऽस्मिन् सत्त्वसंश्रयाः । (१०।१)

ब्राह्मणा ब्रह्मयोनिस्थास्ते धीराः साधुदर्शिनः ॥ (१०।२)

हित्वा सर्वाणि पापानि निःशोका ह्यजरामराः । (११।१)

दिवं प्राप्य तु ते धीराः कुर्वते वै ततस्ततः ॥ (११।२)

ईशित्वं च वशित्वं च लघुत्वं मनसश्च ते । (१२।१)

विकुर्वते महात्मानो देवास्त्रिदिवगा इव ॥ (१२।२)

ऊर्ध्वस्रोतस इत्येते देवा वैकारिकाः स्मृताः । (१३।१)

विकुर्वते प्रकृत्या वै दिवं प्राप्तास्ततस्ततः । (१३।२)

यद् यद् इच्छन्ति तत् सर्वं भजन्ते विभजन्ति च ॥ (१३।३)

इत्येतत् सात्त्विकं वृत्तं कथितं वो द्विजर्षभाः । (१४।१)

एतद् विज्ञाय विधिवल् लभते यद् यद् इच्छति ॥ (१४।२)

प्रकीर्तिताः सत्त्वगुणा विशेषतो यथावद् उक्तं गुणवृत्तम् एव च । (१५।१)

नरस्तु यो वेद गुणान् इमान् सदा गुणान् स भुङ्क्ते न गुणैः स भुज्यते ॥ (१५।२)