भीष्म उवाच । (१।१)

स वनानि विचित्राणि तीर्थानि च सरांसि च । (१।२)

अभिगच्छन् क्रमेण स्म कंचिन्मुनिम् उपस्थितः ॥ (१।३)

तं स तेन यथोद्दिष्टं नागं विप्रेण ब्राह्मणः । (२।१)

पर्यपृच्छद् यथान्यायं श्रुत्वैव च जगाम सः ॥ (२।२)

सो ऽभिगम्य यथाख्यातं नागायतनम् अर्थवित् । (३।१)

प्रोक्तवान् अहम् अस्मीति भोःशब्दालंकृतं वचः ॥ (३।२)

ततस्तस्य वचः श्रुत्वा रूपिणी धर्मवत्सला । (४।१)

दर्शयामास तं विप्रं नागपत्नी पतिव्रता ॥ (४।२)

सा तस्मै विधिवत् पूजां चक्रे धर्मपरायणा । (५।१)

स्वागतेनागतं कृत्वा किं करोमीति चाब्रवीत् ॥ (५।२)

ब्राह्मण उवाच । (६।१)

विश्रान्तो ऽभ्यर्चितश्चास्मि भवत्या श्लक्ष्णया गिरा । (६।२)

द्रष्टुम् इच्छामि भवति तं देवं नागम् उत्तमम् ॥ (६।३)

एतद्धि परमं कार्यम् एतन्मे फलम् ईप्सितम् । (७।१)

अनेनार्थेन चास्म्यद्य सम्प्राप्तः पन्नगालयम् ॥ (७।२)

नागभार्योवाच । (८।१)

आर्य सूर्यरथं वोढुं गतो ऽसौ मासचारिकः । (८।२)

सप्ताष्टभिर् दिनैर् विप्र दर्शयिष्यत्यसंशयम् ॥ (८।३)

एतद् विदितम् आर्यस्य विवासकरणं मम । (९।१)

भर्तुर् भवतु किं चान्यत् क्रियतां तद् वदस्व मे ॥ (९।२)

ब्राह्मण उवाच । (१०।१)

अनेन निश्चयेनाहं साध्वि सम्प्राप्तवान् इह । (१०।२)

प्रतीक्षन्न् आगमं देवि वत्स्याम्यस्मिन्महावने ॥ (१०।३)

सम्प्राप्तस्यैव चाव्यग्रम् आवेद्यो ऽहम् इहागतः । (११।१)

ममाभिगमनं प्राप्तो वाच्यश्च वचनं त्वया ॥ (११।२)

अहम् अप्यत्र वत्स्यामि गोमत्याः पुलिने शुभे । (१२।१)

कालं परिमिताहारो यथोक्तं परिपालयन् ॥ (१२।२)

भीष्म उवाच । (१३।१)

ततः स विप्रस्तां नागीं समाधाय पुनः पुनः । (१३।२)

तद् एव पुलिनं नद्याः प्रययौ ब्राह्मणर्षभः ॥ (१३।३)